Apple və Intel: Köhnə Sevgililər Barışır? Çip Dünyasında Böyük Köç Başlayır!

Texnologiya dünyasında «heç vaxt, heç vaxt demə» prinsipi bir daha özünü doğruldur. 2020-ci ildə Apple öz prosessorlarına keçərək Intel-ə «sağ ol, mən tək davam edəcəm» desə də, görünən odur ki, bu ayrılıq uzun sürməyəcək. Amma bu dəfə münasibətlər bir az fərqlidir – Apple Intel-dən beyin yox, sadəcə «əzələ» (istehsal gücü) istəyir.

The Wall Street Journal və məşhur analitiklər Ming-Chi Kuo ilə Jeff Pu-nun verdiyi məlumatlara görə, Apple öz giriş seqmenti çiplərinin istehsalını TSMC-dən Intel-ə keçirməyi planlaşdırır. Səbəb isə bəsitdir: TSMC hazırda NVIDIA-nın süni intellekt sifarişləri altında boğulur. Apple isə növbəyə durmağı sevmir, xüsusən də söhbət milyonlarla satılan iPhone və Mac-lardan gedirsə.

İnsayderlər deyir ki, 2027-ci ildən etibarən Intel-in Ohayo ştatındakı zavodlarında Apple-ın M seriyalı «büdcəli» çipləri, 2028-ci ildə isə baza model iPhone-lar üçün A seriyalı prosessorlar yığılacaq. Yəni, «Pro» modellər hələ ki TSMC-nin premium qanadında qalacaq, amma «sadə ölümlülər» üçün olan cihazlar Intel-in əli ilə gələcək. Intel üçün bu, möhtəşəm bir qayıdışdır – sanki keçmiş sevgilin səni işə götürür ki, onun yeni sevgilisi çatdıra bilmədiyi işləri sən görəsən.

#apple #intel #tsmc #texnologiya