Microsoft-un Yeni «Canavarı»: Maia 200 ilə Süni İntellekt Erasında Yeni Sənayeləşmə Başlayır!

Texnologiya nəhəngi Microsoft, süni intellekt (AI) dünyasında kartları yenidən paylamağa hazırlaşır. Şirkət rəsmi olaraq Maia 200 adlı yeni nəsil çipini təqdim etdi. Bu çip sadəcə bir prosessor deyil, Microsoft-un «yeni sənayeləşmə» adlandırdığı böyük strateji planın əsas sütunudur. TSMC-nin ən qabaqcıl 3-nm (N3P) texnoloji prosesi ilə istehsal olunan bu çip, birbaşa süni intellekt modellərinin təlimi və işlədilməsi üçün optimallaşdırılıb.

Maia 200-ün texniki göstəriciləri hətta ən tələbkar texnoloji həvəskarları belə heyrətləndirir: o, 216 QB HMB3e video yaddaşa malikdir və saniyədə 7 TB məlumat ötürmə qabiliyyətinə (bandwidth) sahibdir. Müqayisə üçün desək, bu, ChatGPT-nin beyninin saniyələr içində minlərlə ensiklopediyanı «həzm etməsi» deməkdir. Microsoft-un əsas hədəfi isə 850 milyard manat (500 milyard dollar) dəyərində olan «Stargate» layihəsidir. Maia 200 çipləri məhz bu nəhəng infrastrukturun ürəyi olacaq və gələcək ChatGPT versiyalarının «məşqçisi» rolunu oynayacaq. Maraqlıdır ki, Microsoft bu çipin analoqlarından 30% daha səmərəli olduğunu deyəndə, söhbət təkcə sürətdən getmir. Şirkət etiraf edir ki, öz çipini istehsal etmək onlara rəqiblərdən hazır məhsul almaqdan 30% daha ucuz başa gəlir. Yəni həm güclü, həm də cibə qənaət edən bir texnologiyadan söhbət gedir.

Lakin Microsoft bununla dayanmır. Şirkət eyni zamanda Cobalt adlı mərkəzi prosessor (CPU), kvant hesablamaları üçün Majorana çipi və xüsusi kriptoqrafik prosessorlar üzərində də işləyir. Belə görünür ki, Microsoft artıq «bulud» şirkətindən tam bir apparat təminatı nəhənginə çevrilir.

#microsoft #maia200 #suniintellekt #techflow